Hum kabhi nahi mil payenge?

Kuch chootta sa lag raha hai

Andar kahin ek dard sa ho raha hai

Pata nahi kyo ek ladi toot si rahi hai

Kya hum phir kabhi nahi mil payenge?

Phir sochti hoon,

Tum apne raste jaoge, main apne

Tum ho kaun mere jo itna roti hoon

Phir ye bhi sochti hoon,

Kuch yaad bhi hai tumhe?

Kya main yaad rahoongi?

Mujhe toh sab kuch yaad hai,

Par shayad “yaadein dhundli ho jati hain”.

Kya hum phir kabhi nahi mil payenge?

Sawaal karti hoon, Jawaab koi nahi

Udaas hoti hoon,

Phir sapno mein tumse baatein karti hoon

Phir subah hoti hai aur tumhari ek khabar ka intezaar karti hoon

Phir roti hoon, phir raat ke hone ka intezaar karti hoon.

Kya hum phir kabhi nahi mil payenge?

Sochti hoon mil jaate toh kya hota?

Ek chhota sa aashiyaana hota humara

Ladte jhagadte, phir maan jaate, hanste khoob gaaney gaatey hum

Bahut pyar hota, kabhi bhi beyparwah panchiyon ki tarah

Khule aasmaan ko chhoone nikal jaate

Kya hum phir kabhi nahi mil payenge?

Mera akelapan aur meri parchhayi hain

Ye dono pehle bhi the,

Tum inke banaye huye bulbuley ko

Tod kar meri zindagi mein aaye the.

Ek vishwas leke aaye the, naye rang leke aaye the

Jaise tumhe mera hi intezaar tha, jaise main tumhara sab kuch thi.

Jaise mere bina tumhara Jeevan adhoora tha

Aagey ki zindagi bhi sanwaar lenge yeh dawa tha tumhara-

Par sab kuch wahin adhoora chhor gaye

Kya hum phir kabhi nahi mil payenge?

Us waqt ko samete baithi hoon

Aagey nahi chal pati hoon, Shayad tum aao

Ab bahut kuch choot ta sa lag raha hai

Ek hi sawaal aaj mujhe sone nahi de raha

Kya hum phir kabhi nahi mil payenge?