Milna bichhadna hai jaise
Zindagi ki dhoop chhanv
Milo toh garmaahat,
Samet lo apne andar,
Bhigo lo apne rooh ko isse!
Jab wo bicchar jaaye toh,
Bas wo geelapan hi reh jaata hai
Jo ajeeb si geeli mitti si mehek chhor jata hai.
Jaane wale ko kaun rok paya hai-
Bas yaadein aur wo geelapan...
Samet liya apne andar wo garmaahat,
Par wo geelapan isse sookhega kabhi nahi!

Holi ke rang kahan se lau?

Mere ghar mein andhera hai,
Rango ki duniya bahar dikhti hai, andar aati nahi.
Aaj socha aasmaan ko dekh loon-
Dekh hi rahi thi toh aasmani rang mila!
Socha neeche park se thoda hara rang le loon-kahin gadha, kahin halka, kahin peela sa... Kitne rang mile!
Phir phoolon ko dekha jo saamne gharo ke balconiyon mein lagey the-
Miley rang gulaabi, peela, lal, baingani. Phir kuch kabootar aayein mere balcony pe, kuch sparrows bhi.. Unme dekha toh rang miley, bhurey, gehre neeley, unke bhi shades and tints.
Kitne rang hain har taraf, ye duniya kitni rangeen hai.
Mere ghar ke andhere mein main in rangon ko dekhti hi nahi, jaise ki mera dukh hi bada ho, kisi aur ka itna bada hi nahi!
Aaj aao mere ghar, mera ghar bahut rangeen hai. Mera mann bahut geela. Meri bhaasha bahut meethi aur mere ghar mein milega aapko sukoon.
Holi ke rang lekar aana, Gulaal aur Gujiya bhoolna mat!
-Aparajita.